भोंगवलीच्या पृथ्वीराज भोसलेला राज्यस्तरीय कुस्ती स्पर्धेत सुवर्णपदक
कापूरहोळ : सातारा जिल्ह्यामधील कराड येथे महाराष्ट्र राज्य कुस्तीगीर संघाच्या मान्यतेने आणि मिशन ऑलिंपिक गेम्स असोसिएशन महाराष्ट्र यांच्या वतीने राज्य अजिंक्यपद कुस्ती स्पर्धा आयोजित करण्यात आली होती. त्याठिकाणी भोंगवली गावचा सुपुत्र पृथ्वीराज भोसले याने अंतिम फेरीत प्रतिस्पर्धी पैलवानावर मात करत सुवर्णपदक पटकावले.
या स्पर्धेत १७ वर्षां खालील अनेक प्रतिभाशाली पैलवानानी भाग घेतला होता, महाराष्ट्र राज्य अजिंक्यपद कुस्ती स्पर्धेत, ७१ किलो वजनी गटामध्ये पृथ्वीराज भोसलेने सुवर्णपदक पटकावत गाव तालुक्यासह जिल्ह्याचे नाव उज्वल केले आहे. तो या नेत्रदीपक कामगिरीमुळे राष्ट्रीय-अंतरराष्ट्रीय स्पर्धा खेळण्याकरिता पात्र झाला आहे. पृथ्वीराजने आपले कौशल्य आणि कठोर परिश्रम यांच्या जोरावर प्रतिस्पर्धकांना धूळ चारली. अंतिम फेरीत त्याने जबरदस्त कामगिरी करत सुवर्णपदकावर आपले नाव कोरले.
पृथ्वीराजचे वडील संग्राम भोसले यांनी या यशाचे श्रेय त्याचे प्रशिक्षक वस्ताद काका पवार, नितीन शिरगांवकर, एन.आय.एस. प्रशिक्षक जयदीप गायकवाड व निलेश लोखंडे यांना दिले आहे. त्यांनी केलेल्या योग्य मार्गदर्शनामुळेच पृथ्वीराजला हे यश मिळवता आले आहे, पृथ्वीराज लहानपणापासूनच खेळकर स्वभावाचा होता. त्याची व्यायामाची आवड ओळखून त्याला कुस्तीत आणण्याचा निर्णय घेतला आणि आज त्याचे यश पाहून आम्हाला त्याचा खूप अभिमान वाटत आहे असे त्यांनी सांगितले.
पृथ्वीराजने मिळवलेल्या या अभूतपूर्व यशाबद्दल संपूर्ण भोर तालुक्यातुन सर्व स्तरांतून त्याच्यावर अभिनंदनाचा वर्षाव होत आहे, पृथ्वीराज भविष्यात राष्ट्रीय आणि आंतरराष्ट्रीय पातळीवर नक्कीच मोठी कामगिरी करेल असा विश्वास प्रशिक्षकांनी आणि कुस्ती प्रेमींनी व्यक्त केला.




