भोर नगरपालिकेत आरोप-प्रत्यारोप, वैयक्तिक टीका आणि वादग्रस्त वक्तव्य ! सभागृहातील शाब्दिक संघर्षामुळे विकासकामे रखडली !! नागरिकांमध्ये असंतोष : सतिश चव्हाण
भोर : भोर नगरपालिकेत गेल्या काही दिवसांपासून सुरू असलेल्या वादग्रस्त घडामोडी, आरोप-प्रत्यारोप आणि सभागृहातील शाब्दिक संघर्षामुळे शहरातील नागरिकांमध्ये नाराजीचे वातावरण निर्माण झाले आहे. शहराच्या विकासाशी संबंधित प्रश्न, मूलभूत सुविधांची उभारणी आणि जनहिताच्या विषयांवर चर्चा होण्याऐवजी राजकीय मतभेदांनाच अधिक महत्त्व दिले जात असल्याची भावना नागरिकांकडून व्यक्त होत आहे.
नगरपालिका निवडणुकीला अवघे चार महिने पूर्ण झाले असतानाच नगरसेवकांमधील अंतर्गत मतभेद उघडपणे समोर येऊ लागल्याचे चित्र दिसून येत आहे. सभागृहातील बैठकीदरम्यान एकमेकांवर करण्यात येणारे आरोप, वैयक्तिक टीका आणि वादग्रस्त वक्तव्यांमुळे नगरपालिकेची प्रतिमा मलिन होत असल्याची चर्चा शहरात सुरू आहे. विकासकामांबाबत ठोस निर्णय घेण्याऐवजी राजकीय संघर्ष वाढत असल्याने नागरिकांमध्ये अस्वस्थता वाढली आहे.
शहरातील रस्ते, पाणीपुरवठा, स्वच्छता, रोजगारनिर्मिती, वाहतूक व्यवस्था तसेच नागरी सुविधांशी संबंधित अनेक प्रश्न प्रलंबित आहेत. या समस्यांवर गांभीर्याने चर्चा होऊन ठोस उपाययोजना अपेक्षित असताना सभागृहातील वातावरण मात्र संघर्षमय होत असल्याची खंत नागरिकांनी व्यक्त केली. लोकप्रतिनिधींनी पक्षीय मतभेद बाजूला ठेवून शहराच्या विकासाला प्राधान्य द्यावे, अशी अपेक्षा नागरिकांमधून व्यक्त होत आहे.
काँग्रेसचे प्रवक्ते सतीश चव्हाण यांनी सांगितले की, भोर शहराच्या सर्वांगीण विकासासाठी केंद्र व राज्य शासनाच्या विविध योजनांमधून मोठ्या प्रमाणात निधी आणि संधी उपलब्ध होऊ शकतात. मात्र स्थानिक पातळीवर विकासाच्या मुद्यांपेक्षा राजकीय वादांनाच अधिक महत्त्व दिले जात असल्याने विकासाची गती मंदावत आहे. आगामी काळात रोजगारनिर्मिती, औद्योगिक वाढ, पाणीप्रश्न आणि नागरी सुविधांवर लक्ष केंद्रित करणे आवश्यक असल्याचे त्यांनी नमूद केले.
दरम्यान, नगरपालिकेतील वाढत्या गोंधळामुळे नागरिकांमध्ये असंतोष वाढत असून शहराच्या हितासाठी सर्व पक्षांनी एकत्र येत सकारात्मक भूमिका घ्यावी, विकासकामांना गती द्यावी आणि लोकांच्या अपेक्षांवर खरे उतरावे, अशी मागणी आता जोर धरू लागली आहे. नागरिकांच्या मते, राजकीय संघर्षाऐवजी विकासाला प्राधान्य दिल्यासच भोर शहराच्या प्रगतीचा मार्ग अधिक वेगाने खुला होऊ शकतो.
