जिल्हा मध्यवर्ती बँक भरतीत स्थानिकांना ७० टक्के आरक्षण ! तरुणांना रोजगाराची मोठी संधी
पुणे : राज्य सरकारने जिल्हा मध्यवर्ती सहकारी बँकांमधील पदभरती प्रक्रियेत मोठा आणि महत्त्वपूर्ण निर्णय घेत स्थानिक उमेदवारांना ७० टक्के आरक्षण देण्याचा निर्णय जाहीर केला आहे. या निर्णयामुळे संबंधित जिल्ह्यातील तरुणांना त्यांच्या स्व-जिल्ह्यात रोजगाराच्या संधी उपलब्ध होण्यास मोठी मदत होणार आहे. तसेच बँकांच्या भरती प्रक्रियेत होणाऱ्या कथित मनमानीला आळा बसण्याची अपेक्षा व्यक्त केली जात आहे.
सरकारच्या नव्या धोरणानुसार, जिल्हा मध्यवर्ती सहकारी बँकांमधील रिक्त पदांपैकी तब्बल ७० टक्के पदे ही केवळ त्या जिल्ह्यातील पात्र उमेदवारांमधून भरली जाणार आहेत. उर्वरित ३० टक्के जागांसाठी इतर जिल्ह्यांतील उमेदवार किंवा खुल्या प्रवर्गातील अर्जदारांचा विचार केला जाणार आहे.
या निर्णयामुळे ग्रामीण व शहरी भागातील सुशिक्षित बेरोजगार तरुणांना स्थानिक पातळीवर नोकरीच्या संधी वाढतील, असा विश्वास व्यक्त केला जात आहे. सहकार क्षेत्रातील भरती अधिक पारदर्शक आणि स्थानिकाभिमुख करण्याच्या दृष्टीने हा निर्णय महत्त्वाचा मानला जात आहे.
