पिंपरी चिंचवड महानगरपालिका निवडणुकीचा धुरळा सुरु ! आजपासुन (मंगळवार २३ डिसें.) उमेदवारी अर्ज भरणे चालु !! वेळ सकाळी ११ ते दुपारी ३
निगडी : पिंपरी चिंचवड महानगरपालिका सार्वत्रिक निवडणूक २०२५-२६ साठी उमेदवारांचा उमेदवारी अर्ज दाखल करण्याची प्रक्रिया आज मंगळवार, दि. २३ डिसेंबर २०२५ पासून सुरू होत आहे. ही प्रक्रिया सकाळी ११ ते दुपारी ३ वाजेपर्यंत महानगपालिकेच्या ८ क्षेत्रीय कार्यालयांमध्ये पार पडेल, अशी माहिती आयुक्त तथा निवडणूक अधिकारी श्रावण हर्डीकर यांनी दिली आह़े.
निवडणूक प्रक्रिया सुलभ व पारदर्शक होण्यासाठी प्रत्येक क्षेत्रीय कार्यालयात स्वतंत्र निवडणूक निर्णय अधिकारी कार्यालये उघडण्यात आली आहेत. उमेदवारांना प्रभागनिहाय नामनिर्देशन पत्रे ३० डिसेंबरपर्यंत ऑफलाईन दाखल करता येतील. अंतिम दिवशी सकाळी ११ ते दुपारी २ वाजेपर्यंत ही सुविधा उपलब्ध असेल प्रत्येक कार्यालयात प्रशासकीय यंत्रणा, कर्मचारी व तांत्रिक सुविधा उपलब्ध करून देण्यात आल्या आहेत.
प्राप्त झालेल्या उमेदवारी अर्जाची छाननी ३१ डिसेंबरला होईल, उमेदवारी अर्ज माघारी घेण्यासाठी २ जानेवारी २०२६ ही अंतिम तारीख आहे. चिन्ह वाटप व अंतिम उमेदवारांची यादी ३ जानेवारीला जाहीर करण्यात येईल, प्रत्यक्ष मतदान १५ जानेवारीला तर मतमोजणी १६ जानेवारीला पार पडेल. सर्व टप्पे निवडणूक आयोगाच्या वेळापत्रकानुसार राबविले जातील.
उमेदवारांनी आवश्यक कागदपत्रे, प्रत व शुल्क वेळेत सादर करावे, नियमांचे उल्लंघन झाल्यास उमेदवारी अर्ज बाद होऊ शकतो असे महानगरपालिकेच्या वतीने सांगण्यात आले आहे, उमेदवार व राजकीय पक्षांनी निवडणूक आयोगाच्या नियमांचे व वेळेचे काटेकोर पालन करावे असे आवाहन करण्यात आले आहे.
