मुळशी तालुक्यातील पौड येथे दिवाणी व फौजदारी न्यायालय स्थापन करण्यास मंत्रिमंडळाची मंजुरी

मुळशी : पुणे जिल्ह्यातील पौड ता.मुळशी येथे लिंक कोर्ट ऐवजी दिवाणी न्यायालय, कनिष्ठ स्तर व न्यायदंडाधिकारी प्रथम वर्ग या न्यायालयाची स्थापना करण्यास व त्यासाठी आवश्यक अशा 12 नियमित पदांना व बाह्य यंत्रणेद्वारे घ्यावयाच्या 4 पदांना, तसेच त्यासाठीच्या आर्थिक तरतूदीस आज झालेल्या महाराष्ट्र राज्याच्या मंत्रिमंडळाच्या बैठकीत मान्यता देण्यात आली, तसेच यासाठीच्या वेतन व वेतनेत्तर खर्चासाठीच्या 1 कोटी 64 लाख 9 हजार 852 रुपयांच्या तरतुदीसही बैठकीत मान्यता देण्यात आली.

सध्या पौड येथे ठिकाणी लिंक कोर्ट कार्यरत आहे. या न्यायालयाच्या कार्यक्षेत्रातील प्रलंबित प्रकरणांची संख्या व न्यायालय स्थापनेसाठी आवश्यक पायाभूत सुविधांची उपलब्धता हा निकष लक्षात घेऊन उच्च न्यायालयाच्या न्यायालय स्थापना समितीने लिंक कोर्ट ऐवजी दिवाणी न्यायालय कनिष्ठ स्तर व न्याय दंडाधिकारी प्रथम वर्ग या न्यायालयाची स्थापना करण्याची शिफारस केली आहे. हे न्यायालय स्थापन झाल्यामुळे पौड येथील प्रलंबित प्रकरणे जलद गतीने चालविणे सुलभ होईल. तसेच नागरिकांसाठी व पक्षकारांची मोठी सोय होऊन, या तालुक्यातील नागरिकांसाठी जलदगतीने न्यायदान प्रकिया राबविता येणार आहे.